Materion Defnyddwyr

Roedd yr hwylustod o gael eich siopa wythnosol wedi’i ddanfon i’ch drws bob amser yn debygol o daro tant â defnyddwyr.  Dros amser, mae cyflymderau rhyngrwyd cyflymach a dyfeisiau symudol fel ffonau neu dabledi wedi ei gwneud yn fwy hwylus i wneud eich siopa wythnosol ar-lein.  Mae dyfeisiau clyfar wedi gwella hyn ymhellach, gan ei wneud yn ddidrafferth.  Bydd datblygu technoleg newydd yn parhau i wneud siopa ar-lein yn llawer haws i ddefnyddwyr.

Mae amodau’r cyfyngiadau symud wedi cefnogi’r duedd siopa ar-lein ymhellach, wrth i ddefnyddwyr sy’n awyddus i osgoi siopau gorlawn symud i’r byd ar-lein.  Roedd cyfran ar-lein o’r gwerthiant bwyd cyn Covid c.7%, gan gyrraedd uchafbwynt o 15% yn ystod y cyfyngiadau symud, a sefydlogi i 13%-14% o’r gwerthiant dros y misoedd diwethaf (Kantar), er bod amodau’r cyfyngiadau symud wedi cael eu llacio.

Ar ben hynny, mae ymchwil Levercliff wedi dangos bod lefelau bodlonrwydd yn uwch gyda siopa ar-lein - mae defnyddwyr iau yn arbennig yn fodlon parhau i wneud y rhan fwyaf o'u siopa fel hyn ac ychydig sydd wedi colli siopa mewn siop; fodd bynnag, yn ystod ein hymchwil, nododd defnyddwyr hŷn (65 oed a throsodd) eu bod yn mwynhau mynd allan i siopa. Mae hyn yn dangos yn glir pa mor bwysig yw adnabod eich defnyddiwr.

Categorïau

Mae gwahanol gategorïau’n perfformio’n well mewn amgylchedd ar-lein.  Alcohol yw’r prif berfformiwr yn y cyfrwng hwn, gyda dros 50% o siopwyr y DU yn prynu’r cynnyrch yma ar-lein yn ôl Statista.

Mae gan alcohol bresenoldeb ar-lein sydd wedi’i ddatblygu’n gymharol dda, ac mae modd ei brynu mewn sawl ffordd, gan gynnwys gwasanaethau tanysgrifio, arbenigwyr diodydd ar-lein yn ogystal â safleoedd siopau bwyd ar-lein.

Mae’n cynnwys amrywiaeth o anghenion, o brynu mewn swmp, i sicrhau bod y bargeinion gorau’n cael eu danfon yn rhwydd i’ch drws, i ddod o hyd i’r diod arbennig hwnnw y gwnaethoch chi roi cynnig arno yn y bar crand ar noson allan.

Nid yw’n syndod nad yw cynnyrch ffres yn perfformio cystal ar-lein, gyda llawer o ddefnyddwyr eisiau gweld y cynnyrch cyn prynu a gallu sicrhau’r ffresni a’r ansawdd pan fyddan nhw mewn siop. Bydd hi bob amser yn well gan nifer sylweddol o ddefnyddwyr fynd i siopau i ddewis eu ffrwythau, eu cynnyrch wedi’u pobi, eu llysiau a’u cig ffres.

Cwmnïau

Felly, beth mae hyn yn ei olygu i fusnesau bwyd a diod sydd am fanteisio i’r eithaf ar y cyfrwng hwn?

Bydd trosglwyddiad cyfran fawr o ddefnyddwyr o siop go iawn i siop ar-lein yn arwain at oblygiadau sylweddol i frandiau. Bydd y rheini nad ydyn nhw’n addasu yn colli cyfleoedd gwerthu allweddol.

Dylid ystyried yn ofalus pa ateb ar-lein sy’n gweddu orau i’ch cwmni a’ch cynnyrch.  A fyddai’n well mynd yn syth at ddefnyddwyr drwy eich gwefan eich hun, adeiladu presenoldeb mewn marchnad ar-lein fel Amazon neu gael rhestriad gyda manwerthwr ar-lein fel Ocado?

Os ydych chi wedi’ch rhestru gyda chwmni mawr sydd â siop ar-lein, gwnewch yn siŵr bod eich cynnyrch ar gael ar-lein – does dim sicrwydd bob amser!

Yn yr un modd â mynd i siop, bydd angen hyrwyddo eich cynnyrch... ac nid yw hyn yn golygu’r pris yn unig. Er enghraifft, mae Ocado wedi cynnig cyfle yn ddiweddar i bob cyflenwr, drwy ei bartner Citrus Ad, i gyflenwyr wneud cais am gynnyrch noddedig a chael slot baner hysbysebu ar safle Ocado.

Mae ystyriaethau allweddol eraill yn cynnwys sicrhau bod gennych chi ddelweddau deniadol o ansawdd uchel o’ch cynnyrch, a disgrifiadau clir a pherthnasol - does dim pwynt galw eich cynnyrch yn ‘gyffaith mefus’ pan fydd y rhan fwyaf o ddefnyddwyr yn chwilio am jam.

Cliciwch yma i lawrlwytho ein hadroddiad cryno ar Siopa Bwyd Ar-lein.

Defnyddwyr

Mae Llywodraeth y DU yn bwriadu cyflwyno deddfwriaeth sy'n gwahardd BOGOFs a 3 am 2 ar fwydydd afiach o fis Ebrill 2022, bydd Llywodraeth yr Alban yn debygol o ddilyn ei hesiampl, ar ôl ymrwymo eisoes i gyflwyno'r ddeddfwriaeth angenrheidiol.

Bydd defnyddwyr yn debygol o ymateb yn gadarnhaol i'r ddeddfwriaeth newydd hon, gan y gwyddom o'n hymchwil eu bod am i weithgynhyrchwyr a manwerthwyr ei gwneud yn haws iddynt wneud dewisiadau iachach. Dim ond amser a ddengys a fyddant yn gwneud y dewisiadau hynny mewn gwirionedd.
Roedd yn ddiddorol gweld, pan ofynnwyd iddynt beth oedd yn dylanwadu ar eu penderfyniad i brynu cynnyrch neu frand, bod cynigion yn is i lawr y rhestr nag y byddwn wedi'i ddisgwyl (mae'n amrywio yn ôl manwerthwr, gyda chynigion yn bwysicach i bobl sy’n siopa yn Asda o’i gymharu â Waitrose).

Mae ein harolwg tracio diweddaraf hefyd yn dangos bod 30% o ddefnyddwyr wedi gwneud newidiadau i'w deiet/ffyrdd o fyw yn ystod y 3 mis diwethaf am resymau iechyd. Mae hyn yn galonogol, ond y 25% sy'n teimlo bod angen iddynt wneud newidiadau ond heb eu gwneud, sydd fwyaf tebygol o elwa o'r cyfyngiadau hyn.

Categorïau

Bydd yn ddiddorol gweld sut mae'r categorïau y mae'r ddeddfwriaeth yn effeithio arnynt yn ymateb, mae'r rhain yn cynnwys melysion, cacennau, bisgedi, creision a pha ddulliau fydd yn cael eu defnyddio i ysgogi twf. A fyddwn yn gweld strategaeth EDLP go iawn yn dod i'r amlwg ar gyfer rhai neu ynteu ai’r realiti fydd mwy o bwyslais ar brisiau uchel/isel, gyda defnyddwyr yn cael eu temtio i brynu mwy nag sydd ei angen arnynt tra bydd cynigion ar gael (ac yna yn y rhan fwyaf o achosion, yn bwyta mwy nag yr oeddent wedi'i fwriadu)?

Rwy'n gwybod fy mod i’n bersonol bob amser yn prynu fy hoff frand iogwrt Groegaidd pan fydd cynnig arbennig ar gael, gan brynu tri o rai 500g yn lle’r pot 1kg i pan allaf weld eu bod yn well gwerth am arian. Pan ofynnwyd iddynt pa newidiadau y maent (y 30%) wedi’u gwneud am resymau iechyd, roedd yn galonogol gweld bod y mwyafrif yn bwyta mwy o ffrwythau a llysiau ond hefyd roedd yn ddiddorol gweld bod defnyddwyr iau yn torri'n ôl ar ddiodydd llawn siwgr (gwaherddir ail-lenwi am ddim mewn bwytai hefyd o dan y ddeddfwriaeth newydd).

Cwmnïau

Mae'r ddeddfwriaeth hon yn her i frandiau sydd wedi dibynnu ar ymgyrchoedd hyrwyddo i sbarduno gwerthiant, bydd yn anodd dangos i brynwr masnach dwf o flwyddyn i flwyddyn. Fodd bynnag, mae'n debyg y bydd cysur o wybod y bydd cystadleuwyr yn y categori yn wynebu’r un broblem. Bydd yn ddiddorol gweld a yw cwmnïau'n cymryd strategaeth benodol (channel) ac yn cynnig BOGOF yn y fasnach annibynnol lle bydd hyn yn dal i gael ei ganiatáu. Os bydd hyn yn digwydd a bod defnyddwyr yn dechrau prynu dau far o siocled ar hap yn hytrach na'r un yr oeddent yn ei fwriadu, siawns na fydd yn cyflymu penderfyniad y Llywodraeth i ymestyn cyrhaeddiad y ddeddfwriaeth?

Gyda llai na blwyddyn hyd nes y daw'r ddeddfwriaeth hon i rym yn Lloegr, sut y dylai cwmnïau ymateb? Drwy fuddsoddi yn y tymor hir, drwy edrych o ddifrif ar eu hymagwedd tuag at hyn oll. O ystyried y dystiolaeth gryf a gyflwynwyd gan Field and Binet, bellach dylai mwy nag erioed o gwmnïau fod yn buddsoddi mewn adeiladu brand hirdymor a sicrhau rhaniad cyllideb @60:40 yn eu cyllideb farchnata a sicrhau bod defnyddwyr yn deall y gwahaniaeth a sut y maent yn elwa ohono.

Y Cwsmeriaid

Ydyn nhw’n poeni, neu beidio? Mae hynny’n gwestiwn sy’n cael ei ofyn fwyfwy gan gwmnïau wrth iddyn nhw geisio deall a ydy cwsmeriaid yn poeni am nodweddion cynaliadwyedd brandiau ai peidio ac a ydyn nhw’n fodlon talu mwy am nwyddau sy’n cael eu cynhyrchu’n foesegol. Does dim un ateb cywir i hyn mewn gwirionedd.

Fel sy’n wir bob amser pan fyddwn yn sôn am gwsmeriaid, mae pob un yn wahanol, ac efallai bod yr hyn sy’n bwysig o ran cynaliadwyedd i un cwsmer ddim wedi croesi meddwl cwsmer arall. Fodd bynnag, pecynnu ydy’r mater pwysicaf i gwsmeriaid o ran bwyd a diod.
Roedd ein Harolwg Tracio diweddaraf yn tynnu sylw at becynnu fel y maes ble roedden nhw’n teimlo y dylai gweithgynhyrchwyr bwyd a diod fod yn blaenoriaethu eu hymdrechion pan ddaw hi’n fater o gamau amgylcheddol i ganolbwyntio arnyn nhw.

Rydyn ni’n gwybod o astudiaethau blaenorol fod cwsmeriaid yn y DU yn teimlo mai cyfrifoldeb gwneuthurwyr a manwerthwyr, yn hytrach na nhw eu hunain, ydy cymryd camau breision yn y maes hwn. Fodd bynnag, mae’n ddiddorol gweld bod dros 45% bellach yn rhagweithiol eu hunain ac yn mynd ati i geisio lleihau gwastraff bwyd fel ffordd o helpu i fynd i’r afael â difrod amgylcheddol.

Categorïau

Mae rhai categorïau lle mae pryderon cwsmeriaid ynghylch pecynnu eisoes yn arwain at newidiadau mewn ymddygiad. Er enghraifft, canfu ein hymchwil fod 32% yn osgoi prynu dŵr potel. Mae’r cyhoeddusrwydd ynghylch plastigau untro ac effaith y rhaglen ‘Blue Planet’ wedi golygu bod cwsmeriaid yn newid i ddefnyddio dŵr tap. Fodd bynnag, mae diogelwch yn dal i ddod o flaen yr amgylchedd wrth iddyn nhw barhau i brynu mwy o ffrwythau a llysiau wedi’u lapio nag oedden nhw’n ei wneud cyn COVID-19.

Gan gymryd dau gategori cwbl wahanol, ee, dŵr a chig coch, gallwn weld pryderon amgylcheddol gwahanol iawn yn dod i’r amlwg. Dyma lle mae angen i gwmnïau feddwl am yr effaith fwyaf y mae eu categori yn ei chael ar yr amgylchedd a chanolbwyntio ar atebion arloesol i fynd i’r afael â’r rhain. Bydd angen i gig coch gael ei becynnu mewn deunyddiau y gellir eu hailgylchu yn sicr, ond ei her fwyaf fydd rhoi sylw i’r holl gyhoeddusrwydd negyddol ynghylch effaith amgylcheddol nwyon methan o wartheg.

Cwmnïau

Ddylai cwmnïau sy’n dymuno dod yn fwy ecogyfeillgar ddim cymryd yn ganiataol y bydd cwsmeriaid yn rhuthro i’w gwobrwyo am eu hymdrechion.  Fodd bynnag, dros amser mae’n fwyfwy tebygol y bydd y cwmnïau hynny sy’n canolbwyntio ar frandiau a chynnyrch cynaliadwy yn gweld gwerth ychwanegol ar y llinell waelod. Mae brandiau Byw’n Gynaliadwy Unilever yn brawf o hyn – gan dyfu 69% yn gyflymach na gweddill y busnes a chyfrannu at 75% o dwf y cwmni.

Dim ond os bydd busnesau’n deall yn iawn beth mae cwsmeriaid eu categori yn chwilio amdano o ran cynaliadwyedd y daw twf. Pan fydd busnesau’n deall anghenion cwsmeriaid, bydd angen iddyn nhw gydnabod y bydd yn cymryd strategaeth ysgogi ac ymgyrchoedd marchnata sy’n canolbwyntio ar adrodd straeon emosiynol yn hytrach na llawer o ffeithiau i annog cwsmeriaid roi’r gorau i ddim ond meddwl a theimlo a dechrau gweithredu go iawn o blaid yr amgylchedd.  O dan arweiniad emosiynau, byddan nhw fel arfer yn mynd y tu hwnt i feddwl yn rhesymol.

Defnyddwyr

Mae canlyniadau ein 5ed arolwg tracio Covid19 ar gael nawr!

Wrth i ni edrych ymlaen at flwyddyn fwy cadarnhaol, mae ein harolwg wedi datgelu bod defnyddwyr yn edrych ymlaen at y pethau syml mewn bywyd – teulu, ffrindiau ac iechyd. Ond mae arian ar feddwl llawer iawn ohonyn nhw hefyd.

Rydyn ni gyd wedi cael ein gorfodi i siopa’n wahanol, ond bydd yr arferion newydd hyn yn aros. Mae defnyddwyr wedi arfer siopa’n llai aml ac mae llawer o bobl yn newid i siopa ar-lein. Maen nhw’n croesawu’r newidiadau hefyd. Mae dros 40% o ddefnyddwyr yn ystyried Covid19 yn gatalydd ar gyfer datblygu arferion newydd fel gwneud eu bwyd eu hunain, gwneud mwy o ymarfer corff a bwyta’n iachach.

Categorïau

Wrth i ni gamu i mewn i’r gwanwyn a’r haf, mae’n debygol mai’r newid mawr fydd ail-ddechrau digwyddiadau teuluol bach a mwy o gymdeithasu yn yr awyr agored. Gallai hyn arwain at gyfleoedd i gwmnïau bwyd wrth fynd gynnig pethau mwy deniadol ar gyfer grwpiau bach a phicnics. Hefyd, efallai y bydd rhywfaint o’r adloniant clasurol mwy o faint yn dychwelyd.

Mae’r cynnydd yn nifer y bobl sy’n gwneud eu bwyd eu hunain yn debygol o gael effaith barhaol. Ond, mae defnyddwyr yn amheus ac yn chwilio am atebion, fel prydau sy'n addas i deuluoedd ac sy’n helpu i wella eu repertoire. Mae pobl yn dechrau diflasu, ac mae’r dacteg farchnata glasurol o awgrymu ryseitiau syml yn fwy perthnasol nag erioed. Edrychwch ar sut mae ffeta wedi’i bobi wedi dal dychymyg y byd!

Cwmnïau

Mae siopau bwyd yn parhau i elwa o’r gwasanaethau bwyd yn cau. Fodd bynnag, bydd y cwmnïau hyn yn dechrau dod dan bwysau dros y misoedd nesaf. Mae’n fwy perthnasol nag erioed meddwl am eich strategaethau a pharatoi ar gyfer y cam nesaf - adferiad.

Camwch yn ôl o'ch categori, meddyliwch sut mae eich defnyddwyr yn byw a sut mae eu hanghenion craidd yn newid - oherwydd mae eu hanghenion yn sicr yn newid.

Nid gwneud eu bwyd eu hunain yw popeth. Mae cyfleoedd newydd i arwain ar wastraff bwyd, pecynnu ac arweinyddiaeth amgylcheddol a helpu eich defnyddwyr i fyw bywydau iachach - yn gorfforol ac yn feddyliol.

Llwythwch ein hadroddiad diweddar i lawr yma

Defnyddwyr

Ionawr 2010, chwiliwyd am y gair ‘Fegan’ 3 miliwn o weithiau yn y DU. Gan neidio ymlaen i Ionawr 2020, chwiliwyd am y gair 100 miliwn o weithiau. Mae’r symudiad Fegan wedi newid o fod yn ddatganiad gwleidyddol yn seiliedig ar Actifyddion i fod yn fwy o ddewis ffordd o fyw buddiol, sy’n dderbyniol yn gymdeithasol ac yn gyfrifol, drwy gymorth yr ymgyrch ‘Fegionawr’ sydd wedi bod yn llwyddiant mawr. Mae’r digwyddiad wedi datblygu o ddim yn 2014 i gael dros 540.000 o bobl yn cofrestru yn 2021. Dim ond i un cyfeiriad y mae poblogrwydd Bwyd Fegan yn mynd.

Dim ond tua 1% o’r boblogaeth sy’n Fegan, felly er bod y farchnad yn ymddangos yn fach, mae’n cyrraedd llawer iawn mwy o bobl. Canfu arolwg olrhain Ionawr 2021 Levercliff  fod 11% o’r holl ddefnyddwyr nad oeddent yn fegan, wedi penderfynu cymryd rhan yn Fegionawr 2021 – nifer sylweddol, gyda 9% o’r holl ddefnyddwyr yn prynu bwyd fegan penodol, gan godi i 17% yn y grŵp oedran 18-34. Pam? Y prif reswm oedd helpu i golli pwysau, rhoi hwb i fwyta’n iach, am resymau lles anifeiliaid ac i gefnogi eraill sydd hefyd yn ei wneud.

Categorïau

Fel categori, fe wnaeth bwydydd Fegan berfformio’n gryf yn y farchnad manwerthu yn 2020. Mae’n wir dweud bod y mwyafrif o gategorïau wedi perfformio’n gryf o ganlyniad i’r Cyfnod Clo yn rhoi hwb i wario ar fwyd a diod, ond mae bwydydd Fegan wedi bod yn perfformio’n uwch na’r categori. Yn ôl Kantar, roedd twf gwerthiant prydau fegan oer dros 25% yn 2020, mwy na dwbl gweddill y categori, tra bod twf prydau fegan wedi’u rhewi yn 15% yn erbyn 13%.

Mae’r mathau hyn o niferoedd yn gwneud manwerthwyr yn hapus iawn ac yn annog mwy o ofod, cyfrif SKU ac arloesi. Yr union beth rydym yn ei weld ar draws y mwyafrif o fanwerthwyr.

Cwmnïau

Ionawr, bellach, yw’r adeg o’r flwyddyn i lansio cynhyrchion Fegan. Mae’r gyfradd fethu yn ymddangos yn sylweddol, ond mae’r lefelau arloesi’n uchel. Eleni, rydym wedi gweld buddsoddiad ar raddfa fawr gan y Coop yn eu cynhyrchion ‘GRO’, tra bod Asda wedi dilyn arweiniad Sainsbury’s o ychydig flynyddoedd yn ôl ac wedi lansio Cigydd Fegan o’r enw ‘Veelicious’. Maent yn honni mai cam ‘profi a dysgu’ ydyw i weld beth sy’n cael cefnogaeth defnyddwyr.

O ran cynhyrchion, bu ffocws penodol ar ‘unioni’r elfennau sylfaenol’, gyda nifer o ‘brif fwydydd’ ar gael mewn amrywiaethau Fegan, yn cynnwys ystod ehangach gan Heinz, wy hylif gan Crackd, ‘llefrith’ siocled gan Galaxy ac ystod eang o friwgig fegan amgen.

Os nad yw eich cwmni wedi mynd ati o ddifrif i ddatblygu cynllun ar gyfer cynhyrchion Fegan, nawr yw’r amser i feddwl yn ddifrifol amdano.

Cyfyngiadau

Mae pedair Llywodraeth y DU wedi cytuno i lacio’r cyfyngiadau dros y Nadolig gyda thri chartref yn gallu ffurfio swigen am bedwar diwrnod o 23 Rhagfyr ymlaen.

I ddefnyddwyr, mae hynny’n debygol o olygu y bydd y Nadolig yn dechrau’n gynnar. Mae’n debygol y bydd llai o bobl yn dod at ei gilydd, ond y byddan nhw’n treulio fwy o amser gyda’i gilydd. Efallai y gwelwn bartïon llai, a chyfle perffaith i gael gwared â’r ewythr blin hwnnw rhag ymuno â'r dathliadau! Ond wrth i’r cyfyngiadau ddod yn ôl i rym cyn y Flwyddyn Newydd, mae hynny’n debygol o gael effaith fawr ar y dathliadau arferol.

Rydyn ni wedi gweld tystiolaeth bod defnyddwyr yn paratoi ar gyfer y Nadolig yn gynnar. Gyda nerfusrwydd ychwanegol yn sgil Brexit, a phryderon ariannol, mae llawer yn osgoi prynu mewn panig munud olaf. Rydyn ni hefyd yn debygol o weld y bydd defnyddwyr yn parhau i brynu ar-lein wrth iddyn nhw geisio osgoi siopau Nadolig gorlawn.

Categorïau

Mae newid o ran arferion defnyddwyr yn cael effaith ar gategorïau mewn gwahanol ffyrdd. Fel arfer, alcohol, cynnyrch becws, melysion, bisgedi, creision a byrbrydau sawrus sydd wedi elwa o gynnydd yn y gwerthiant dros y Nadolig wrth i ddefnyddwyr baratoi i fwynhau eu hunain.

Mae’n debyg mai alcohol fydd y categori sy’n ‘elwa fwyaf’ ym maes manwerthu. Yn yr un modd â chyfyngiadau’r cyfnod clo, wrth i letygarwch dal i ddioddef, rydyn ni’n debygol o weld mwy o ddefnyddwyr yn rhoi cynnig ar eitemau newydd.

Gallai hefyd fod yn gyfnod tyngedfennol ar gyfer categorïau allweddol. Mae gwerthiant cacennau wedi dioddef yn ystod y cyfyngiadau symud wrth i ddefnyddwyr bobi gartref mwy. Mae’r Nadolig fel arfer yn gyfnod proffidiol i’r categori cacennau ac yn un y bydd y cynhyrchwyr am ei gael yn iawn ar ôl blwyddyn siomedig.

Er y gallai fod cynnydd yn yr wythnos sy’n arwain at y Nadolig, efallai y bydd defnyddwyr yn cadw un llygad at y dyfodol a bydd hyn yn arwain yn y pen draw at ddefnydd cymedrol. Gallai’r angen am fwy o gynllunio yn ogystal â rhagor o gyfyngiadau symud yn y flwyddyn newydd arwain at brynu mwy ystyrlon.

Cwmnïau

Ni fydd eleni’n Nadolig nac yn Flwyddyn Newydd ‘arferol’, felly mae’n amser i gwmnïau feddwl yn wahanol i’r arfer hefyd. Gyda dim ond ychydig wythnosau tan y Nadolig, does dim llawer mwy y gall y rhan fwyaf o gwmnïau ei wneud bellach. Ond mae amser o hyd i wneud y gorau o’ch cyfathrebiadau, gan sicrhau eu bod yn gwbl berthnasol i’ch defnyddwyr targed. Mae’n adeg pan fydd defnyddwyr newydd efallai’n dangos diddordeb yn eich categori a’ch cynnyrch, felly dewch i’w hadnabod.

Mae hefyd yn amser gwych i weld beth mae cwmnïau bwyd a diod eraill wedi bod yn ei wneud. Ewch i mewn i’r siopau a chadw’ch llygaid ar agor. Peidiwch ag edrych ar eich categori a’ch cystadleuwyr eich hun yn unig, cymerwch gipolwg iawn o’ch cwmpas. Os nad ydych chi’n gweld rhywbeth ac yn meddwl ‘biti na fydden ni wedi meddwl am hynny’ neu ‘fe allen ni wneud rhywbeth fel yna’, dydych chi ddim yn edrych yn ddigon caled.

Defnyddwyr

Nid oeddwn i erioed wedi clywed am adferiad siâp K tan yr wythnos hon, ond mae'n gwneud synnwyr. Mae'n rhagweld y bydd dirwasgiad Covid yn effeithio llai ar weithwyr proffesiynol mwy cefnog, ac y byddant yn adfer yn gyflymach; tra bod y rhai hynny mewn swyddi manwerthu, hamdden a gwaith â llaw yn cael eu heffeithio'n fwy difrifol, gan adfer ar gyfradd arafach o lawer. Mae'n ymddangos y byddai’r duedd hon yn dod i'r amlwg yn ein cartrefi â chyfyngiadau symud, gyda thon 4 yn dangos pryderon cynyddol ynghylch colli swyddi. Os nad ydych wedi ei ddarllen eto, cliciwch yma.

Mae’r ‘gwahaniaeth mawr’ hwn mewn arian yn cyd-fynd â ‘gwahaniaeth mawr’ mewn hyder o ran diogelwch hefyd, yn ystod y cyfnod Covid. Mae defnyddwyr hŷn yn arbennig yn anesmwyth ynglŷn â mynd allan, a chyda cyfyngiadau lleol ar waith ar draws rhannau o'r wlad, a dyfodiad tywydd y gaeaf, mae'r cyfan yn edrych ychydig yn ddigalon.

Pan fydd pethau'n dechrau mynd yn anodd, rydw i, fel llawer o ddefnyddwyr, yn edrych am gysur ar ffurf bwyd. P'un a yw hynny’n golygu rhannu rhywbeth wedi'i bobi ar Instagram, coginio pryd rhamantus, neu bryd bwyd teuluol syml, mae bwyd yn ein cysylltu yn ogystal ag yn rhoi ymdeimlad o bwrpas i ni.

Categorïau

Mae pob categori yn wahanol, ond i mi, mae'r cysyniad hwn o ddirwasgiad siâp K yn ffordd ddiddorol o feddwl am newid cenhadaeth defnyddwyr mewn categorïau. Mae'n awgrymu ei bod yn debygol y bydd angen i gategorïau fodloni cenhadaeth dau fath o ddefnyddiwr gwahanol sydd ag anghenion hollol wrthgyferbyniol. Ar y naill law, y rhai sy’n cael eu cymell gan werth am arian, ac ar y llaw arall, y rhai sy'n cael eu hysgogi gan gynnyrch o safon ac ansawdd da. Mae newid mewn ffordd o fyw yn gyffredin i bawb h.y. bwyta allan yn llai aml, naill ai oherwydd cyfyngiadau, pryder neu gyfyngiadau ariannol

Mae hyn i gyd yn awgrymu i mi, nad nawr yw'r amser i roi'r gorau i arloesi. Yn hytrach, mae angen i chi wir ddeall sut mae anghenion eich defnyddwyr yn newid ac yn esblygu, a sut y gallwch ddiwallu eu hanghenion. Mae'n dod yn fwyfwy tebygol na fydd hwn yn ddirwasgiad siâp V miniog, byr, felly mae angen i ni baratoi ar gyfer y daith hir, a sicrhau bod categorïau manwerthu o leiaf, yn ffynnu trwy arloesi.

Cwmnïau

Mae yna ychydig o enghreifftiau syml o fanwerthwyr yn arloesi i weddu i'r dirwasgiad siâp K hwn. Fe wnaeth Iceland hyrwyddo eu cynnyrch unigryw Greggs yn amlach, tra bod Co-op ac Asda wedi lansio ystod newydd o becynnau prydau bwyd ‘tecawê cartref’ ar yr un pryd, a ddatblygwyd yn ystod y cyfyngiadau symud. Rydym ni i gyd yn gyfarwydd â'r cysyniad hwn ar gyfer bwyd ethnig, ond mae eu bocsys Piri Piri yn syniad ysbrydoledig yn fy marn i.

Mae’r lleoliadau Foodservice wedi cael effaith ddiddorol ar ben arall y sbectrwm. Er bod llawer wedi cael eu gorfodi i gau (yn enwedig yn yr Alban), mae pecynnau prydau bwyty wedi dod yn ôl yn gryf iawn, gyda phrisiau cyfartalog pecynnau coginio gartref rhwng £40 a £50 am 2. Mae lefel y manylion, y gwariant a’r elfen bersonol yn rhai nad ydym yn eu gweld gyda manwerthu bwyd, ac mae'n debygol o apelio at y rheini lle nad yw’r dirwasgiad yn effeithio gymaint arnynt yn ariannol.

Felly, beth yw'r neges fawr? Meddyliwch sut byddai dirwasgiad siâp K yn effeithio ar eich busnes nawr, a ydych chi'n gwybod beth yw’r effaith debygol ar sefyllfa eich defnyddwyr, ac mewn blwyddyn, sut gallwch chi ddweud eich bod wedi’u helpu i oroesi'r storm. Byddwch yn glir beth yw eich rôl yn y categorïau rydych chi'n gweithredu ynddynt.

Defnyddwyr

Rydw i’n pendroni’n aml (fel llawer ohonoch rwy’n siŵr) beth fydd effeithiau hir-dymor y cyfnod clo ar ymddygiad defnyddwyr.
Un o’r prif newidiadau mewn ymddygiad y mae Levercliff ac eraill wedi sylwi arno yw sut mae ymddygiadau bwyta ac yfed wedi newid – rhai wedi’u gorfod arnom ac eraill yn ddewisol.
Rydw i’n meddwl mai’r unig ffordd o ddeall sut bydd yr ymddygiadau hyn yn datblygu dros y tymor canolig a hir fydd trwy ddarganfod a monitro teimladau, anghenion, agweddau ac amgylchiadau sylfaenol defnyddwyr. Mae llawer o bethau gwahanol yn gyrru pob math o ymddygiad.
Er enghraifft, os cymerwn ni un newid mewn ymddygiad – gwneud eich bwyd eich hun yn amlach – mae llawer o ffactorau posib yn gyrru hyn.
-Amser – Mae gen i fwy o amser i wneud hyn
-Mwynhau – Rydw i wedi dysgu/ailddysgu hobi newydd rydw i’n ei mwynhau
-Meithrin – Rydw i eisiau gwarchod a meithrin fy nheulu
-Myfyrgar – Fel gweithgaredd creadigol mae’n helpu gyda theimladau o orbryder
-Iechyd – Rydw i/rydyn ni’n ceisio bwyta’n iachach
-Cynildeb – Mae’n rhatach gwneud eich bwyd eich hun
-Gorbryder siopa – Rydw i’n siopa’n llai aml felly rydw i’n cynllunio fy mhrydau
-Gwerthfawrogiad – Rydw i’n hoffi dangos fy sgiliau coginio i ffrindiau a theulu (ee ar gyfryngau cymdeithasol)

Categorïau

Wrth i lawer o bobl fel fi ddychwelyd i fywyd mwy ‘arferol’, y cymudo dyddiol a’r plant yn dychwelyd i’r ysgol, efallai y bydd ganddyn nhw lai o amser i goginio ond fydd y teimladau, yr anghenion, a’r agweddau eraill ddim o anghenraid yn diflannu. Sut gall y categorïau esblygu i gyflenwi’r anghenion hyn?
Mae rhai categorïau bwyd cyfleus, fel prydau parod, wedi dioddef o ganlyniad i’r cynnydd yn y duedd i wneud eich bwyd eich hun. Gallai newid olygu mwy o bwyslais ar ryseitiau cartref mewn prydau parod (cynhwysion cwpwrdd siop/oergell gartref) neu opsiynau i’r teulu. Neu ymgais o’r newydd i wneud i’r fformat pecyn rysáit werthu’n dda mewn siopau...efalllai gyda llai o strwythur neu am bris rhatach.
O ran y categorïau cynhwysion, gallaf weld pwyslais newydd ar fwydydd cyflym, hawdd a fforddiadwy sy’n atgoffa rhywun o’r ymgyrch Feed a Family for a Fiver gan Jamie Oliver a Sainsbury’s yn ystod y dirwasgiad diwethaf.

Cwmnïau

Rydw i’n credu bod cyfle i frandiau aros yn berthnasol a datblygu cysylltiadau dyfnach â’u cwsmeriaid drwy fod yn sensitif i anghenion a theimladau wrth iddyn nhw ddatblygu.
Enghraifft dda o gwmni wnaeth arallgyfeirio’n gyflym i ddiwallu angen yw Robert’s Bakery sy’n lleol i mi. Yn gynnar yn y cyfnod clo fe wnaethon nhw lansio pecyn pobi bara yn syth i’r drws.
I fynd yn ôl at y dirwasgiad diwethaf, bryd hynny fe wnaeth brandiau llwyddiannus gymryd sylw o anghenion y cyfnod...trît fforddiadwy (yr effaith lipstic) neu drît penwythnos fforddiadwy (noson fawr gartref).
Ond, gyda set newydd o amgylchiadau efallai y bydd pethau’n wahanol y tro hwn. Mae talu sylw i beth mae eich cwsmeriaid yn ei feddwl ac yn ei deimlo mor bwysig ag erioed.

Defnyddwyr

Yma yn Levercliff rydyn ni wrth ein bodd yn gwylio pobl ac o bryd i’w gilydd mae rhywbeth yn fy ysgogi i gofio fy mod i hefyd yn ddefnyddiwr, yr un fath â phawb rydyn ni’n sylwi ar eu hymddygiad! Rydw i wedi bod yn edrych ar ein Harolwg Olrhain Covid diweddaraf ac rydw i’n gallu gweld ymddygiadau’n datblygu yr ydw i hefyd yn dechrau eu harfer, neu o leiaf yn ceisio gwneud hynny! Mae’r rhain yn ymwneud ag iechyd ac effaith Joe Wicks. Sylw gan un o’n panelwyr wnaeth i mi sylweddoli hyn pan ddarllenais ei ateb i ‘pam ei fod yn bwyta mwy o brotein’. ‘Deiet yr hyfforddwr corff’ oedd yr ateb, sef Wicks. Rydw i hefyd wedi mynd ati i archebu powdwr protein i’w roi yn rhai o’i ryseitiau ac rwyf wedi bod yn ymarfer bob bore dan arweiniad JW mewn ymgais i wneud mwy o ymarfer corff a bwyta’n iachach. Tybed a all JW helpu’r genedl i ddeall yr hyn mae deietegwyr y byd hwn wedi bod yn ei ddweud wrthym ers cyhyd - nid y deiet diweddaraf sy’n mynd i’n gwneud ni’n iachach, ond mynd ati mewn ffordd fwy holistaidd i fyw’n iachach.

Categorïau

Mae’r misoedd diwethaf wedi bod yn rhai anodd i’r categori chwaraeon a maeth, gan nad yw eu marchnad graidd wedi gallu mynd i’r gampfa. Fodd bynnag, gallai’r newydd ddyfodiaid hyn sydd â’u bryd ar ‘iechyd holistaidd’ fod yn gyfle.

Efallai y dylai adwerthwyr fod yn meddwl yn ehangach na ‘maeth chwaraeon’ yn unig. Allen nhw ei gwneud hi’n haws i’r defnyddiwr fabwysiadu ffordd iachach o fyw? Efallai drwy gyfeirio a thynnu sylw at gynhyrchion sy’n uchel mewn protein e.e. cnau a chig. Mae Sainsbury’s wedi creu pwynt gwahaniaeth yn yr eil goffi – gan addysgu’r defnyddiwr am wahanol fathau o goffi ac o ble maen nhw’n dod. Efallai y gellid gwneud yr un fath ar y silffoedd ac addysgu cwsmeriaid am broteinau ffres? Neilltuo lle ar gyfer addysg protein, gan dynnu sylw at gynnwys maeth gwahanol gigoedd?

Cwmnïau

Mae angen i gwmnïau helpu defnyddwyr i fabwysiadu ffordd holistaidd o ymdrin ag iechyd. Gallai hyn fod drwy hysbysebu penodol am eu cynnyrch a sut mae’n cyfrannu at ffordd iachach o fyw, er enghraifft. Mae llawer y gall cwmnïau ei ddysgu gan Joe Wicks ac rwyf yn amau y bydd y cwmni sy’n daro bargen gyda ef i lansio amrywiaeth o brydau cytbwys yn gwneud yn dda iawn. Mae eisoes mewn partneriaeth â Gousto, gwasanaeth bocs ryseitiau, sy’n ymfalchïo yn y ffaith ei bod yn hawdd i deuluoedd fwynhau cinio cartref iach – mae’r fenter fusnes hon yn awgrymu y byddai’n barod i weithio gyda chynnyrch manwerthu.

Defnyddwyr

Gan ddefnyddio canlyniadau ein harolwg, mae ein tîm dirnadaethau wedi datblygu pedwar proffil defnyddiwr newydd i’ch helpu chi i ddeall sut mae Covid19 yn effeithio ar ddefnyddwyr. Mae’r argyfwng yn effeithio ar wahanol ddefnyddwyr mewn gwahanol ffyrdd. Er nad yw rhai pobl yn sylwi ar newidiadau enfawr, mae eraill yn poeni. Dyna’r tueddiad rydyn ni’n disgwyl fydd yn parhau, a byddwn yn cadw llygad barcud ar y cynnydd yn yr arolwg nesaf. Cliciwch ar y ddolen hon i lwytho'r adroddiad uchafbwyntiau i lawr a chwrdd â Chartrefi dan Gyfyngiadau Symud.

Categorïau

Er bod y gwariant cyffredinol ar fwyd yn cynyddu, mae Covid19 yn effeithio’n enfawr ar sut mae defnyddwyr yn siopa. Ar y lefel uchaf, mae gwerthu alcohol, proteinau a bwydydd ffres wedi cynyddu, gyda’r galw am fwydydd cyfleus fel brechdanau, salad parod a phrydau parod yn gostwng. Oherwydd bod defnyddwyr yn cael eu gorfodi i fyw’n wahanol, mae’r angen am fwyd wedi newid. Bydd rhai o’r arferion hyn yn parhau, ac mae ein harolwg yn eich helpu i ddeall a allai’r newidiadau hynny effeithio ar eich busnes. Cliciwch y ddolen hon i lwytho'r adroddiad uchafbwyntiau i lawr.

Cwmnïau

Beth mae hyn yn ei olygu? Beth ddylech chi ei wneud? Dyma’r amser i drawsnewid eich busnes. Byddwch yn hyblyg. Edrychwch lle mae eich marchnad yn mynd gan addasu eich cynnig i weddu i hynny. Yn ystod cyfnod cychwynnol y cyfyngiadau symud, gwelwyd cyfnod o ymateb ar unwaith, ateb y galw neu fusnesau’n ‘cysgu’. Nawr rydyn ni’n gweld arloesi go iawn. Mae rhai cwmnïau’n ailagor ac yn ailddyfeisio eu busnesau, ac mae eraill yn gwneud newidiadau mwy cynnil. Nid oes un ateb a wnaiff y tro i bawb. Mae dod o hyd i’r wybodaeth fwyaf priodol ar gyfer eich busnes yn allweddol.

Cofiwch ein bod ni yma i helpu. Mynd i’r afael â’r pethau allweddol y gallwch eu gwneud i ddiogelu eich busnes yn y dyfodol.